سعيدة قراش: 'رئيسنا.. نهار اليوم باش يكون طويل على تونس' 

2019/07/27 07:50

يودع الشعب التونسي اليوم السبت 27 جويلية 2019 رئيس الجمهورية الباجي قايد السبسي الذي وافته المنية صباح الخميس 25 جويلية 2019.

وكتبت الناطقة الرسمية لرئاسة الجمهورية سعيدة قراش كلمات مؤثرة استحضرت من خلالها محادثة دارت بينها وبين رئيس الجمهورية الراحل داخل مكتبه، ثم ختمتها قائلة ' شعبك اليوم باش يودعك وينسيك الغصة الي مشيت وهي معاك.. ونعاهدوك اننا سنحب البلاد كما لا يحب البلاد احد، ولو قتلونا ولو شردونا لعدنا غزاة لهذا البلد كيف ما قال شاعرنا الكبير أولاد أحمد..'

وفي ما يلي تدوينة الناطقة الرسمية باسم رئاسة الجمهورية : 
 
رئيسنا، نهار اليوم باش يكون طويييييل على تونس  الي حبيتها وفنيت حياتك في خدمتها، و على التوانسة الي حبيت تعطيهم احسن ما عندك من افكار و إلتزام بيها ومحبة و قدرة على الحلم الجماعي وخرجتنا بيه معاك من سنوات الاغتيالات والخوف والفوضى والرعب بعد الثورة. 

رئيسنا نتذكر  مدة اشهر لتالي، دخلت لمكتبك كيف العادة على خدمة وكيف ما تعودت نعمل مسح سريع لملامح وجهك قبل ما نعطي آش عندي خاصة كيف تكون الأمور ماهياش ، خاطر كنّا انا وفراس وسليم  نخافو عليك برشا أما زادا نقولولك الحقيقة ، وجهك ما عجبنيش، قتلك شبيك سيد الرئيس، فديت؟ قتلي، dégoûté, لكن الله غالب توا يجي نهار ويفهموا أما وقتها أنا ما نكونش هوني في عالم الأحياء. فهمو وفهمنا يا رئيسنا، شعبك بكاك بعفوية وبمحبة كبيرة قد محبتك ليه وللبلاد، شعبك اليوم باش يودعك وينسيك الغصة الي مشيت وهي معاك، ونعاهدوك اننا سنحب البلاد كما لا يحب البلاد احد، و لو قتلونا و لو شردونا لعدنا غزاة لهذا البلد كيف ما قال شاعرنا الكبير أولاد أحمد..'